我最喜愛的香港奢華酒店．03 - 瑰麗酒店

留意番．一：係我最喜愛，唔等於係你最喜愛。我嘅入住期望只係一個正常普通嘅香港人。早checkin 遲 checkout 老馮Upgrade唔係必然。留意番．二：大部分都係2020年嘅評論，都係自費套房住宿，冇收廣告。留意番．三：房價可升亦可跌，每口價包嘅服務都唔同，疫情期間住宿嘅設備同服務亦有開有關。位置：Rosewood 瑰麗酒店位於尖沙咀東部，樓下喺 K11 Musea 藝術購物館（商場），附近係尖沙咀遊客區：香港藝術館、太空館、文化中心；地底係尖東港鐵站。無論商務、遊覽定購物都係一流。酒店景觀都係一流，最好當然係對正維多利亞港灣仔一帶嘅海景，或者中環西邊一帶嘅海景，不過即使係九龍嘅街景（或曰山景）抑或維多利亞港東邊啟德郵輪碼頭一帶嘅景色其實都非常之好。房間：套房好大，景觀最低限度都有維港景色。所有房都係走Cozy Luxury路線，設計帶英倫風。客廳一定擺到四個位嘅布料梳化加茶几同大大部Samsung電視，仲有一張皮製梳化用來望海景。個Mini Bar一啲都唔迷你，因為係茶水間，因為套房關係所有非酒精飲品都係免費！睡房除咗放到一張超大睡床之外，仲夠位放多一張大梳化。臨瞓抑或瞓醒都可以望住靚靚嘅中環維多利亞港景色，超爽！浴室雖然係冇景，但係大到冇朋友！居然有兩set rainfall showers同花灑頭，再加埋超大浴缸，真係唔晚晚浸浴都對唔住自己。浴室備品係大樽裝 Maison Caulières，牙膏你一支家用裝嘅 The Humble Co natural toothpaste ；冇茶包但係有三樽茶葉連茶壺同杯；有專屬雪櫃放有氣及普通礦泉水；仲有一支House Whisky 免費俾你係套房小酌一下；雨遮非常好鋼水（重！）仲要係雙層布，真正做到 make yourself at home！設備：酒店喺2019年開業，所有嘢都係新淨。健身室泳池水療中心一應俱全。健身室超大器材超多超新淨，仲有大大瑜伽房（同瑜伽班）；泳池係 Infinity Pool 望住維多利亞港東邊嘅景色，必打咭。行政海景房同所有套房都可以享受 Manor Club 瑞閣嘅設施，早餐下午茶黃昏雞尾酒全包，亦都有管家服務，仲包每晚兩件衣物濕洗。餐飲：酒店有好幾間餐廳，想住一晚而一次過試齊晒所有餐廳其實冇乜可能。再加埋餐廳啲枱好難Book ，就算係酒店住客都未必一定有枱！Holt’s Cafe 早餐係半自助，其實唔錯，不過我更prefer 喺 Manor Club 食，因為有靚靚海景。彤福軒食順德（即係我家鄉）菜，個人推介個琵琶鵝同倫教糕；Bayfare Social 食西班牙菜最啱 share 嚟食（不過呢期唔太啱）；Henry 係扒房，扒當然好食但最推介係好似煎蘿蔔糕咁嘅薯餅；CHAAT可能會係全香港第一間有米芝連名銜嘅印度菜餐廳；The Butterfly Room全香港嘅Afternoon Tea KOL已經介紹過晒嗰度嘅下午茶所以唔需要我介紹喇。住套房要「善用」番個 Manor Club所以我多數喺瑞閣食三餐。馃構基本上Manor Club 嘅早餐同下午茶喺呢度餐廳嘅「精選版」，黃昏雞尾酒你可以係個 Bar 度飲飲飲，仲一度飲一度睇日落；小食一啲都唔小，仲有中西即煮熱食任叫。服務：有管家服務，check in 直接由管家帶上房完成程序；都可以任叫咖啡茶；Manor Club 職員們都記性（姓）好好，招呼好好；餐廳職員都好有禮貌招呼周到；Housekeeping 都非常體貼，看到我留下好多吉礦泉水樽，打掃後即刻補充大量礦泉水。唔想傾電話嘅話都可以用 WhatsApp Line WeChat ，都會有真人對答。備註：Book咗酒店後記得 Book 埋想食嘅餐廳，冇位是正常的哦，最好提早預訂！最好住兩晚以上，方可盡興！